भाद्र कृष्ण प्रतिपदाको पावन अवसरमा आज काठमाडौं उपत्यकासहित देशविदेशमा नेवार समुदाय र सम्पूर्ण नेपालीहरूले परम्परागत ऐतिहासिक पर्व गाईजात्रा (नेपाल भाषामा ‘सापारु’) भव्यता र धार्मिक निष्ठाका साथ मनाइरहेका छन् । बिहानैदेखि ऐतिहासिक वसन्तपुर दरबार क्षेत्र, हनुमानढोका, गद्दी बैठक र पाटन–भक्तपुरका प्राचीन गल्लीहरूमा जनसागर उर्लिएको छ । विगत एक वर्षभित्र दिवङ्गत भएका आफ्ना परिवारजनको आत्माको चीर शान्ति, सद्गति र स्वर्गारोहणको कामना गर्दै परिवारका सदस्यहरूले बालबालिकालाई गाई, श्रीकृष्ण, राधारानी, जोगी तथा विभिन्न देवी–देवताको भेषभूषामा सिँगारेर नगर परिक्रमा गराएका छन् । मृतकको आत्माले यमलोक जाने क्रममा वैतरणी नदी सजिलै पार गरोस् भन्ने धार्मिक विश्वासका साथ यो पर्व मनाइन्छ ।
