काठमाडौं । चालु आर्थिक वर्ष २०८३/८४ को पहिलो दुई महिनामा बैंक तथा वित्तीय संस्थाबाट निजी क्षेत्रमा जाने कर्जा प्रवाह बढेको छ। नेपाल राष्ट्र बैंकका अनुसार साउनमा २३ अर्ब ५८ करोड रुपैयाँ रहेको कर्जा प्रवाह भदौमा बढेर ९३ अर्ब ५२ करोड रुपैयाँ पुगेको छ।
भदौ मसान्तसम्म निजी क्षेत्रमा प्रवाहित कुल कर्जा १.६ प्रतिशतले बढेर ५९ खर्ब ५० अर्ब ५८ करोड रुपैयाँ पुगेको छ। गत आर्थिक वर्षको सोही अवधिमा यस्तो कर्जा वृद्धि ०.९ प्रतिशत रहेको थियो। वार्षिक बिन्दुगत आधारमा भने निजी क्षेत्रतर्फको कर्जा ७.३ प्रतिशतले बढेको राष्ट्र बैंकले जनाएको छ। निजी क्षेत्रमा प्रवाहित कर्जामध्ये गैरवित्तीय संस्थागत क्षेत्रको हिस्सा ६२.५ प्रतिशत र व्यक्तिगत तथा घरपरिवार क्षेत्रको हिस्सा ३७.५ प्रतिशत रहेको छ।
बैंकको प्रकारअनुसार हेर्दा वाणिज्य बैंकको कर्जा १.७ प्रतिशतले बढेको छ। त्यस्तै, विकास बैंकको कर्जा ०.६ प्रतिशत र वित्त कम्पनीको कर्जा १.४ प्रतिशतले वृद्धि भएको छ। क्षेत्रगत रूपमा खनिज क्षेत्रमा सबैभन्दा बढी १०.४ प्रतिशत कर्जा वृद्धि भएको छ। यातायात उपकरण उत्पादन तथा मर्मतमा ७.६ प्रतिशत, धातुजन्य उत्पादन तथा विद्युतीय सामान उत्पादन क्षेत्रमा ७.३ प्रतिशत र निर्माण क्षेत्रमा ३.७ प्रतिशतले कर्जा बढेको छ। सेवा उद्योगमा २.७ प्रतिशत तथा थोक र खुद्रा व्यापारमा २.५ प्रतिशत वृद्धि भएको छ।
यद्यपि, सबै क्षेत्रमा कर्जा विस्तार भएको छैन। वित्त, बीमा तथा घरजग्गा क्षेत्रमा कर्जा ४.७ प्रतिशत र कृषि क्षेत्रमा २.२ प्रतिशतले घटेको राष्ट्र बैंकले जनाएको छ। बैंक तथा वित्तीय संस्थाको कुल कर्जामध्ये घरजग्गा धितोमा आधारित कर्जाको हिस्सा ६२.८ प्रतिशत रहेको छ भने चालु सम्पत्ति सुरक्षणमा प्रवाहित कर्जाको हिस्सा १५.६ प्रतिशत छ। समग्रमा, चालु आर्थिक वर्षको पहिलो दुई महिनामा निजी क्षेत्रमा कर्जा प्रवाह बढेको देखिए पनि कृषि तथा घरजग्गासहित केही क्षेत्रमा भने कर्जा घटेको तथ्यांकले देखाएको छ।