नयाँ दिल्ली ।
भारतको राजनीतिमा यतिबेला एउटा अनौठो डिजिटल ‘तुफान’ आएको छ । मे १६ मा सुरु भएको ‘ककरोज जनता पार्टी’ (CJP) नामक व्यङ्ग्यात्मक (Satirical) अनलाइन अभियानले स्थापित ठूला दलहरूलाई सामाजिक सञ्जालमा पछि पार्दै हलचल पैदा गरेको छ । इन्स्टाग्राममा यसका फलोअर्सको संख्या १ करोड (१० मिलियन) नाघिसकेको छ, जुन सत्ताधारी दल BJP को भन्दा बढी हो ।
यो अभियानको सुरुवात अदालती टिप्पणीबाट भएको हो । भारतका प्रधानन्यायाधीशले बेरोजगार युवाहरूलाई ‘ककरोज’ (साङ्लो) सँग तुलना गरेको भन्दै आक्रोशित युवाहरूले डिजिटल विद्रोहका रूपमा यो पार्टी घोषणा गरे । “यदि हामी ककरोज हौँ भने, सबै ककरोज एक हौँ” भन्दै सुरु भएको यो ठट्टाले भारतका लाखौँ निराश युवाहरूको भावनालाई प्रतिनिधित्व गर्ने आन्दोलनको रूप लियो ।
यस पार्टीले परीक्षा घोटाला (NEET), प्रश्नपत्र लीक र बढ्दो बेरोजगारी विरुद्ध कडा माग राखेको छ । विपक्षी दलका नेताहरू (जस्तै महुआ मोइत्रा) ले समेत यसलाई समर्थन गरेका छन् । सरकारले यसको आधिकारिक ‘X’ अकाउन्ट प्रतिबन्ध गरे पनि यसको लोकप्रियता रोकिएको छैन ।
यो लहरले भारतमा ‘मीम संस्कृति’ र इन्टरनेट अब केवल मनोरञ्जन मात्र नभई सत्ता र प्रणाली विरुद्ध आवाज उठाउने शक्तिशाली राजनीतिक औजार बनेको प्रमाणित गरेको छ ।
