इन्डोनेसिया। इन्डोनेसियामा हप्तौँदेखि फैलिएको भीषण डढेलोका कारण लाखौँ मानिस प्रभावित भएका छन्।
जंगलमा लागेको आगोबाट निस्किएको बाक्लो धुवाँले सुमात्रा र बोर्नियो द्वीपको इन्डोनेसियाली भूभाग कालिमान्तानसहित आसपासका क्षेत्रको जनजीवन प्रभावित बनेको छ। लामो समयदेखि नियन्त्रणमा आउन नसकेको डढेलोका कारण वातावरणमा विषाक्त धुवाँ फैलिएको छ। धुवाँका कारण श्वासप्रश्वाससम्बन्धी समस्या बढेपछि हजारौँ मानिस अस्पताल भर्ना भएको जनाइएको छ।
आगलागी नियन्त्रणका लागि अग्निनियन्त्रक टोलीले जमिनबाट प्रयास गरिरहेका छन् भने हेलिकप्टरमार्फत पानी खसालेर समेत आगो निभाउने काम भइरहेको छ। अत्यधिक सुख्खा जंगल र फैलिएको आगोका कारण नियन्त्रण प्रयास चुनौतीपूर्ण बनेको बताइएको छ। कालिमान्तानका विभिन्न क्षेत्रमा डढेलोका कारण बाक्लो तुवाँलो फैलिएको छ। कतिपय बस्ती तथा सहरसमेत धुवाँले ढाकिएका छन्। यसले सर्वसाधारणको दैनिक जीवनसँगै स्वास्थ्यमा समेत असर पारेको छ।
इन्डोनेसियाका डढेलो प्रभावित क्षेत्रबाट फैलिएको धुवाँ छिमेकी मुलुक मलेसिया र फिलिपिन्ससम्म पुगेको छ। दक्षिण–पूर्वी एसियाका घना बस्ती भएका क्षेत्रमा वायु प्रदूषणको जोखिम बढेपछि सर्वसाधारणलाई सावधानी अपनाउन आग्रह गरिएको छ। इन्डोनेसियाका सम्बन्धित निकायले डढेलो नियन्त्रण र प्रभावित क्षेत्रमा उद्धार तथा व्यवस्थापनका लागि प्रयास जारी राखेका छन्। यद्यपि, केही स्थानमा हप्तौँदेखि आगो बलिरहेकाले तत्काल पूर्ण रूपमा नियन्त्रणमा आउने अवस्था नरहेको बताइएको छ।