काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले रसुवाको भोटेकोशीमा आएको बाढीपछि सिर्जित विपद्को सामना गर्न सबै राजनीतिक दल र पक्ष एकजुट भएर अघि बढ्नुपर्ने बताएका छन् ।
बुधबार प्रतिनिधिसभाको बैठकमा बोल्दै लामिछानेले विपद्को समयमा एकअर्कामाथि आरोप–प्रत्यारोप गर्ने र राजनीतिक स्वार्थ पूरा गर्ने प्रयास गर्न नहुने बताए । उनले विनाशकारी विपद्पछि पनि राजनीतिक दलहरूबीच कसलाई कमजोर बनाउने भन्ने प्रतिस्पर्धा देखिनु दुःखद भएको भन्दै अहिलेको प्राथमिकता पीडितको उद्धार, राहत र पुनःस्थापना हुनुपर्ने धारणा राखे ।
‘कहालीलाग्दो विपद् र विध्वंसपछि पनि हामीकहाँ विपद्लाई अवसर बनाएर एकअर्कामाथि आरोप लगाउने प्रवृत्ति देखिन्छ । कसलाई कसरी तल खसाल्ने भन्ने खेल खेल्ने र राजनीतिको रोटी सेक्ने समय यो होइन,’ उनले भने । भदौ १० गते रसुवाको भोटेकोशीमा आएको बाढीपछि सबै राजनीतिक शक्ति मिलेर अघि बढ्नुपर्ने अवस्था सिर्जना भएको लामिछानेले बताए ।
उनका अनुसार बाढीपछि रास्वपाले सर्वदलीय बैठक आयोजना गरेको थियो । बैठकमा रास्वपा, नेपाली कांग्रेस, नेकपा एमाले, नेकपा, श्रम संस्कृति पार्टी, राप्रपा, जसपा र जनमत पार्टीका शीर्ष नेताहरू सहभागी भएका थिए । बैठकले विपद् व्यवस्थापन र पुनर्निर्माणका लागि १० बुँदे संकल्पसमेत गरेको थियो । उक्त संकल्पको १०औँ बुँदामा दीर्घकालीन समाधानका लागि उच्चस्तरीय सर्वदलीय संयन्त्र गठन गर्ने विषय समेटिएको थियो ।
संकल्पमा विपद्पछिको पुनर्निर्माण, जलवायु अनुकूलन, राष्ट्रिय विपद् नीतिमा आवश्यक सुधार तथा सरकारका कामकारबाहीको निरन्तर सल्लाह, सहयोग र अनुगमनका लागि संसदीय संयन्त्र गठन गर्ने उल्लेख गरिएको थियो । यस्तो संयन्त्रले संकटको समयमा मात्र नभई विपद् पूर्वतयारी र दिगो विकासका विषयमा राष्ट्रिय सहमति निर्माण गर्दै नीतिगत सुधारमा भूमिका खेल्ने बताइएको थियो । लामिछानेले सो विषयमा बैठकमा थप धारणा नराखे पनि विपक्षी दलका नेताहरूले विपद्को समयमा सरकारलाई साथ दिने र सहकार्य गर्ने रास्वपाको प्रतिबद्धताको प्रशंसा गरेका थिए ।