काठमाडौँ । मनाङको नार्पाभूमि गाउँपालिका–५ स्थित हिम्लुङ क्षेत्रमा गएको हिमपहिरोमा परी ज्यान गुमाउनेको संख्या ७ पुगेको छ। असोज ११ गते आएको हिमपहिरोमा पुरिएका थप तीन जनाको शव सुरक्षाकर्मीले फेला पारेका हुन्।
फेला परेका तीनवटै शव हेलिकप्टरमार्फत काठमाडौँ ल्याइएको छ। हिमपहिरोमा परेका थप ९ जना भने अझै सम्पर्कविहीन छन्। उनीहरूको खोजी कार्य जारी रहेको मनाङकी डीएसपी कोपिला चुडालले जानकारी दिएकी छन्। हिमपहिरोमा परी मृत्यु हुनेमा सङ्खुवासभाका क्षेदी भोटे र पासाङ भोटे, गोरखाका वीरेन्द्र गुरुङ र आसमान गुरुङ, खोटाङका घनश्याम राई र सुरज राई तथा रुकुमका कमल बुढा रहेका छन्। मृतकमध्ये तीन जनाको शव परिवारले बुझिसकेका छन्। बाँकी सम्पर्कविहीन व्यक्तिहरूको खोजी कार्यलाई निरन्तरता दिइएको प्रहरीले जनाएको छ।