मेक्सिको । फिफा विश्वकप फुटबलको उत्साहबीच ‘मर्लिन’ नामको एक घरपालुवा हाँस अहिले सामाजिक सञ्जालमा चर्चाको केन्द्र बनेको छ। मेक्सिकन टोलीको समर्थकका रूपमा प्रस्तुत गरिएको यो हाँसलाई धेरैले मेक्सिकोको ‘अनौपचारिक राजदूत’का रूपमा समेत चर्चा गर्न थालेका छन्। दुई वर्षको मर्लिन मेक्सिकन राष्ट्रिय टोलीको जर्सी र मोजा लगाएर मेक्सिको सिटीका सडकमा निर्धक्कसँग हिँडिरहेको भिडियो सार्वजनिक भएपछि छोटो समयमै भाइरल भएको हो।
विश्वकपका कारण विश्वभर फुटबलप्रेमीको ध्यान खेलाडी र प्रतिस्पर्धातर्फ केन्द्रित भइरहेका बेला मर्लिनले पनि आफ्नो फरक शैलीका कारण धेरैको ध्यान तानेको छ। आफ्नो आकारअनुसार तयार गरिएको सानो मेक्सिको टोलीको जर्सी लगाएर आत्मविश्वासका साथ घर वरपर घुम्ने मर्लिनको दृश्य सामाजिक सञ्जाल प्रयोगकर्ताले निकै रुचाएका छन्। मेक्सिकोले विश्वकपमा आफ्नो पहिलो खेल जितेपछि समर्थकहरूले खुसीयाली मनाइरहेका बेला पहिलो पटक मर्लिनको भिडियो सार्वजनिक भएको थियो। त्यसयता उक्त भिडियो तीव्र रूपमा फैलिएको छ र मर्लिन इन्टरनेटमा चर्चित पात्र बनेको छ।