काठमाडौँ । देशभर मनसुनी वायुको प्रभाव कायमै रहेकाले शुक्रबार पनि मौसम पूर्ण रूपमा खुल्ने सम्भावना कम देखिएको छ।
मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थान आसपास रहेकाले अधिकांश भूभागमा बदली रहनेछ। आज दिउँसो देशभर सामान्यदेखि पूर्ण बदली रहने अनुमान गरिएको छ। हिमाली क्षेत्रका केही स्थानमा चट्याङसहित मध्यम वर्षा हुन सक्नेछ। कोशी, बागमती, गण्डकी र लुम्बिनी प्रदेशका पहाडी भूभागमा धेरै स्थान तथा कर्णाली र सुदूरपश्चिमका पहाडी क्षेत्रमा केही स्थानमा वर्षाको सम्भावना रहेको छ।
यस्तै, मधेस प्रदेशसहित कोशी, बागमती, गण्डकी र लुम्बिनीका तराई क्षेत्रमा पनि केही स्थानमा चट्याङसहित मध्यम वर्षा हुन सक्ने महाशाखाले जनाएको छ। बागमती, गण्डकी र लुम्बिनी प्रदेशका पहाडी तथा तराई भूभागका एक–दुई स्थानमा भने भारी वर्षाको सम्भावना रहेको छ। भारी वर्षाका कारण ती क्षेत्रमा बाढी, डुबान तथा पहिरोको जोखिम बढ्न सक्ने भएकाले आवश्यक सतर्कता अपनाउन मौसमविद्हरूले सुझाव दिएका छन्। यसैगरी, मधेस तथा कोशी र लुम्बिनी प्रदेशका तराई क्षेत्रमा हावाहुरीको समेत सम्भावना रहेको छ।
शुक्रबार राति पनि देशभर सामान्यतया बदली रहनेछ। कोशी, बागमती र गण्डकीका हिमाली क्षेत्रमा केही स्थान तथा लुम्बिनी, कर्णाली र सुदूरपश्चिमका हिमाली भूभागका थोरै स्थानमा चट्याङसहित मध्यम वर्षा हुन सक्नेछ। रातिको समयमा पनि पहाडी तथा तराई भूभागका विभिन्न स्थानमा वर्षाको सम्भावना रहेको छ। विशेषगरी बागमती र गण्डकीका पहाडी भूभाग तथा लुम्बिनीको तराई क्षेत्रमा एक–दुई स्थानमा भारी वर्षा हुन सक्ने महाशाखाले जनाएको छ। त्यसैले यात्रा गर्दा मौसमको अवस्था बुझेर मात्र निस्कन तथा भारी वर्षा हुने क्षेत्रमा नदी, खोला र पहिरोको जोखिमप्रति सचेत रहन आवश्यक देखिएको छ।