काठमाडौं । अखिल नेपाल फुटबल संघ (एन्फा) भित्रको विवाद थप चर्किएको छ। कार्यसमितिको बैठक बोलाउन माग गर्दा पनि अध्यक्षले बैठक नडाकेको भन्दै वरिष्ठ उपाध्यक्ष वीरबहादुर खड्काको नेतृत्वमा बहुमत सदस्यले एन्फा मुख्यालयको ताला खोल्ने र बैठक अघि बढाउने तयारी गरेका छन्।
एन्फा विधानको धारा ३१ को उपधारा २ अनुसार कार्यसमितिका एक तिहाइ वा सोभन्दा बढी सदस्यले लिखित माग गरेमा बैठक बोलाउनुपर्ने व्यवस्था छ। यही व्यवस्थाअनुसार वरिष्ठ उपाध्यक्षसहित कार्यसमितिका ११ सदस्यले बैठकका लागि माग गरेका थिए। तर, २१ दिनसम्म पनि अध्यक्ष पंकजविक्रम नेम्बाङले बैठक नबोलाएपछि आफूहरू अघि बढ्न लागेको वरिष्ठ उपाध्यक्ष खड्काले बताएका छन्।
एन्फा केन्द्रीय सदस्य टीकाराम लामाका अनुसार ललितपुरको सातदोबाटोस्थित मुख्यालयको ताला खोलेर कात्तिक १३ गतेका लागि बैठक बोलाउने पत्र पठाउने तयारी गरिएको छ। उक्त बैठकबाट आवश्यक निर्णय गर्दै सरकार, एसियाली फुटबल महासंघ (एएफसी) र विश्व फुटबल महासंघ (फिफा) लाई सहजीकरणका लागि पत्र लेख्ने योजना रहेको उनले बताएका छन्।
यसैबीच, खेल मिलेमतो तथा ठगीसम्बन्धी कसुरमा एन्फा अध्यक्ष पंकजविक्रम नेम्बाङ, महासचिव किरण राई, कोषाध्यक्ष रविन्द्र जोशी र लेखापाल सञ्जीव पाण्डेविरुद्ध मुद्दा चलाइएको छ। जोशी र पाण्डे धरौटीमा छुटेका छन् भने नेम्बाङ र राई अदालतमा उपस्थित नभएको समाचारमा उल्लेख छ। तेस्रो पक्षको हस्तक्षेप भएको भन्दै फिफाले गत जुन २४ देखि एन्फालाई निलम्बन गरेको जनाइएको छ। एन्फाभित्रको विवाद र अन्तर्राष्ट्रिय प्रतिबन्धका बीच बहुमत सदस्यले अघि बढाउन खोजेको बैठकले अब कस्तो निकास दिन्छ भन्ने चासो बढेको छ।
