काठमाडौँ । फिफा विश्वकप २०२६ को माहोलसँगै चीनमा फुटबल समर्थकहरूको उत्साह बजारसम्म फैलिएको छ। प्रत्यक्ष रूपमा खेल हेर्न स्टेडियम पुग्न नसकेका धेरै समर्थकहरू विश्वकपसँग सम्बन्धित सामग्री खरिद गर्न व्यस्त देखिएका छन्।
विश्वकपका अधिकांश आधिकारिक तथा सहायक सामग्रीहरू चीनमै उत्पादन हुने भएकाले विभिन्न खुद्रा पसल र अस्थायी ‘पप–अप’ स्टोरहरूमा ग्राहकको उल्लेख्य भीड देखिएको छ। प्रतियोगिता सुरु भएको पहिलो दिनदेखि नै बेइजिङसहितका प्रमुख सहरहरूमा किनमेल गर्ने समर्थकहरूको चहलपहल बढेको छ। विश्वकपको अवसरमा बिक्रीका लागि राखिएका मस्कट, खेलौना, सङ्कलनयोग्य सामग्री तथा अन्य स्मरणीय वस्तुप्रति उपभोक्ताको आकर्षण बढेको व्यापारीहरू बताउँछन्। एक ग्राहकले चार वर्षमा एकपटक आउने विश्वकपसँग सम्बन्धित सामग्री सङ्कलन गर्न मन पर्ने भएकाले आफूले विशेष डिजाइनका उत्पादन खरिद गरेको बताए।
प्रमुख ई–कमर्स प्लेटफर्महरूको तथ्यांकअनुसार विश्वकपसँग सम्बन्धित सामग्रीको अनलाइन खोजी उल्लेख्य रूपमा बढेको छ। त्यसको प्रभावस्वरूप खेलौना तथा सङ्कलनयोग्य वस्तुको बिक्रीमा १५० प्रतिशतभन्दा बढी वृद्धि भएको जनाइएको छ। करिब ४० दिनसम्म चल्ने प्रतियोगिताका कारण आगामी दिनमा पनि अनलाइन तथा भौतिक बजार दुवैतर्फ विश्वकपसम्बन्धी सामग्रीको माग बढिरहने अनुमान गरिएको छ। त्यस्तै, समर्थकहरूले आफ्ना मनपर्ने खेलाडीको नाम र जर्सी नम्बर छापेर व्यक्तिगत डिजाइनका जर्सी तयार गराउने क्रम पनि बढेको छ। हाल बजारमा सबैभन्दा बढी बिक्री हुने जर्सीहरूमा अर्जेन्टिना, जर्मनी र स्पेनका टोलीका जर्सी अग्रस्थानमा रहेका छन्। फिफा विश्वकप २०२६ को फाइनल खेल जुलाई १९ मा हुने तालिका छ।