डोल्पा । नेपाल–चीन सीमा क्षेत्रका करिब २०० जना स्थानीय बासिन्दालाई प्रस्थान तथा प्रवेशपत्र वितरण गरिएको छ।
जिल्ला प्रशासन कार्यालय डोल्पाको आयोजना तथा शे–फोक्सुण्डो गाउँपालिकाको सहकार्यमा सीमा क्षेत्रका नागरिकलाई सहज रूपमा सेवा उपलब्ध गराउने उद्देश्यले प्रवेश तथा प्रस्थानपत्र वितरण गरिएको हो। सीमावर्ती क्षेत्रमा बसोबास गर्ने नागरिकलाई दैनिक आवश्यक काम, व्यापार–व्यवसाय तथा सामाजिक गतिविधिका लागि सीमापारि आवतजावत गर्नुपर्ने भएकाले उनीहरूका लागि यस्तो पत्र आवश्यक मानिन्छ। सोहीअनुसार गाउँपालिकासँगको समन्वयमा स्थानीय बासिन्दाको आवश्यक विवरण संकलन गरी प्रक्रिया पूरा गरेर करिब २०० जनालाई प्रवेश तथा प्रस्थानपत्र उपलब्ध गराइएको जिल्ला प्रशासन कार्यालयले जनाएको छ।
भौगोलिक विकटताका कारण सामान्य प्रशासनिक सेवा लिनसमेत जिल्ला सदरमुकाम पुग्नुपर्ने बाध्यता रहेका सीमावर्ती क्षेत्रका नागरिकलाई गाउँमै सेवा उपलब्ध गराइँदा सहज भएको स्थानीयले बताएका छन्। डोल्पाको उत्तरी क्षेत्रमा चीनसँग जोडिएका विभिन्न बस्तीका नागरिकको दैनिकी सीमापारिको आवतजावतसँग समेत जोडिएको छ। दैनिक उपभोग्य सामग्री खरिद, व्यापारिक कारोबार, सामाजिक गतिविधि तथा आफन्तसँगको भेटघाटका लागि स्थानीयलाई नियमित रूपमा सीमावर्ती क्षेत्रमा जानुपर्ने अवस्था रहेको छ।
प्रस्थान तथा प्रवेशपत्र वितरण भएपछि सीमावर्ती नागरिकको आवतजावतलाई कानुनी र प्रशासनिक रूपमा थप व्यवस्थित बनाउन सहयोग पुग्ने अपेक्षा गरिएको छ। साथै, स्थानीय तह र जिल्ला प्रशासनबीचको समन्वयमार्फत दुर्गम क्षेत्रका नागरिकलाई उनीहरूकै गाउँठाउँमा सरकारी सेवा पुर्याउन सकिने उदाहरणका रूपमा यस कार्यक्रमलाई लिइएको छ। शे–फोक्सुण्डो गाउँपालिकाले सीमा क्षेत्रका नागरिकलाई आवश्यक प्रशासनिक सेवा सहज बनाउन आगामी दिनमा पनि जिल्ला प्रशासन कार्यालयसँग सहकार्य र समन्वयलाई निरन्तरता दिने जनाएको छ।कार्यक्रममा स्थानीय जनप्रतिनिधि, प्रशासनका कर्मचारी तथा सीमावर्ती क्षेत्रका स्थानीय बासिन्दाको सहभागिता रहेको थियो।