नुवाकोट । रसुवा बाढी आएको ११औँ दिन शनिबार उद्धार अभियानमा दुई सुखद घटना भएका छन्।
नुवाकोटको बेत्रावतीमा घरको भग्नावशेषमा पुरिएकी ५५ वर्षीया चण्डिका श्रेष्ठ र माथिल्लो त्रिशूली–१ जलविद्युत् आयोजनाको सुरुङमा फसेका एक चिनियाँ नागरिकलाई जीवितै उद्धार गरिएको हो। विदुर नगरपालिका–१० बेत्रावतीस्थित आनन्द श्रेष्ठको चारतले घर पहिरोले आधा पुरिएको अवस्थामा थियो। सोही भग्नावशेषभित्र चण्डिका रहेको सूचना पाएपछि सुरक्षाकर्मीले खोजी तीव्र पारेका थिए। भग्नावशेष हटाउँदै खोजी गर्ने क्रममा उनलाई जीवितै फेला पारिएको सशस्त्र प्रहरीले जनाएको छ।
सशस्त्र प्रहरीका डीएसपी शैलेन्द्र थापाका अनुसार उद्धारपछि चण्डिका बोल्न सक्ने अवस्थामा थिइन्। उद्धार टोलीले उनलाई पानीसमेत खुवाएको थियो। पानी पिएपछि उनको अवस्थामा थप आशा देखिएको उद्धारमा खटिएका सुरक्षाकर्मी तथा स्थानीयले बताएका छन्। उनलाई थप उपचारका लागि हेलिकप्टरबाट काठमाडौं ल्याउने तयारी गरिएको छ। चण्डिकाका श्रीमान् आनन्द श्रेष्ठका अनुसार उनी ५५ वर्षकी हुन्। पहिरोले पुरिएको घरभित्रबाट मानिसले आवाज निकालेको जानकारी पाएपछि सुरक्षाकर्मी घटनास्थल पुगेका थिए। त्यसपछि भग्नावशेष हटाउँदै खोजी गर्दा चण्डिका जीवित अवस्थामा भेटिएकी हुन्।
यसैबीच, शनिबार नै रसुवा बाढीबाट प्रभावित २१६ मेगावाट क्षमताको माथिल्लो त्रिशूली–१ जलविद्युत् आयोजनाको अडिट–४ सुरुङबाट एक चिनियाँ नागरिकलाई पनि जीवितै उद्धार गरिएको छ। नेपाली सेना र दक्षिण कोरियाका विपद् विज्ञ सम्मिलित टोलीले सुरुङभित्र फसेका ती चिनियाँ नागरिकलाई ११औँ दिनमा बाहिर निकालेको हो। उद्धारपछि उनलाई नुवाकोटको त्रिशूलीस्थित मैथली ब्यारेकतर्फ लगिएको जनाइएको छ। भदौ १० गते आएको भीषण बाढीले माथिल्लो त्रिशूली–१ जलविद्युत् आयोजना क्षेत्रसँगै सुरुङमा समेत क्षति पुर्याएको थियो। सुरुङभित्र फसेका व्यक्तिको खोजी तथा उद्धारका लागि नेपाली सेना र विदेशी विपद् विज्ञको टोली परिचालन गरिएको थियो।
यसअघि शुक्रबार पनि बाढी आएको १०औँ दिनमा त्रिशूली–३ ‘ए’ जलविद्युत् आयोजनाको सुरुङबाट दुई जनालाई जीवितै उद्धार गरिएको थियो। सुरुङभित्र फसेका सञ्जय साह र कबिर महर्जनलाई सुरक्षाकर्मीले जीवितै बाहिर निकालेका थिए। लगातार दुई दिन घरको भग्नावशेष र जलविद्युत् आयोजनाका सुरुङबाट मानिसहरू जीवितै उद्धार हुन थालेपछि रसुवा बाढीपछिको खोज तथा उद्धार अभियानमा नयाँ आशा थपिएको छ। लामो समयदेखि सम्पर्कविहीन तथा फसेका अन्य व्यक्तिको खोजीमा समेत यस घटनाले उद्धार टोलीको मनोबल बढाएको छ।