नुवाकोट। नुवाकोटको थानाभञ्ज्याङमा दुईवटा विद्युतीय (इभी) बस दुर्घटनामा परेका छन्। छहरे–काठमाडौँ सडकखण्डअन्तर्गत थानाभञ्ज्याङमा सडक छेउमा रोकिराखेको बसलाई पछाडिबाट आएको अर्को इभी बसले ठक्कर दिँदा दुवै बस सडकबाट भिरतर्फ खसेका हुन्।
प्रत्यक्षदर्शीका अनुसार पछाडिबाट आएको बस तीव्र गतिमा रहेका कारण चालकले नियन्त्रण गुमाउँदा रोकिराखेको बसमा ठक्कर लागेको थियो। ठक्करपछि दुवै बस अनियन्त्रित भएर सडकबाट तल खसेका थिए।
दुर्घटनामा एक जनाको घटनास्थलमै मृत्यु भएको छ भने चार जना गम्भीर घाइते भएका छन्। घाइतेहरूलाई स्थानीयवासी र प्रहरीको सहयोगमा उद्धार गरी उपचारका लागि काठमाडौँ ल्याइएको जनाइएको छ।
प्रहरीले मृतकको पहिचान खुलाउने तथा दुर्घटनाको कारणबारे थप अनुसन्धान गरिरहेको जनाएको छ।