काठमाडौँ । नर्वेजियन क्लब ट्रोम्सोलाई दोस्रो लेगमा ४–० गोलले पराजित गर्दै ब्राइटन एन्ड होभ एल्बियनले तीन वर्षपछि युरोपेली फुटबलको कन्फरेन्स लिगमा पुनः स्थान बनाएको छ।
पहिलो लेग गोलरहित बराबरीमा सकिए पनि दोस्रो लेगमा उत्कृष्ट प्रदर्शन गर्दै ब्राइटनले सहज जितसहित प्रतियोगिताको लिग चरणमा प्रवेश गरेको हो। ब्राइटनका लागि पहिलो हाफमै चाउरालामपोस कोस्टौलास, म्याक्सिम डे कुइपर र म्याट्स वाइफरले गोल गरे। तीन गोलको अग्रता बनाएपछि पनि टोलीले आक्रमण जारी राखेको थियो। खेलको ८६औँ मिनेटमा ओलिभर बोस्काग्लीले चौथो गोल थपेपछि ब्राइटनको जित ४–० ले निश्चित भएको हो। खेलमा ब्राइटनले सुरुदेखि नै ट्रोम्सोमाथि दबाब कायम राखेको थियो। घरेलु टोलीको प्रभावशाली प्रदर्शनका कारण ट्रोम्सोले ब्राइटनको पोस्टतर्फ एकपटक पनि प्रहार गर्न सकेन। ब्राइटनका प्रशिक्षक फ्याबियन हर्जेलरले खेलअघि यो खेललाई ‘गर या मर’को अवस्था बताएका थिए। प्रिमियर लिगको सुरुवाती खेलमा एस्टन भिल्लालाई पनि ४–० ले हराएको ब्राइटनले लगातार दोस्रो खेलमा समान अन्तरको जित निकालेको हो।
यसअघि सन् २०२४ मा युरोपा लिगको अन्तिम १६ सम्म पुगेको ब्राइटनको यो दोस्रो युरोपेली सहभागिता हुनेछ। टोलीमा ज्याक हिन्सेलवुड र जर्जिनियो रटर भने थिएनन्। नयाँ खेलाडी जाउएन हादजामले पनि यस खेलबाट डेब्यु गर्न पाएनन्। शुक्रबार मोनाकोमा हुने कन्फरेन्स लिगको ड्रमार्फत ब्राइटनले लिग चरणका प्रतिद्वन्द्वी पाउनेछ। नयाँ ढाँचाअनुसार प्रतियोगितामा ३६ टोली सहभागी हुनेछन् र प्रत्येक टोलीले फरक ६ प्रतिद्वन्द्वीसँग तीन घरेलु र तीन अवे गरी कुल ६ खेल खेल्नेछन्। ब्राइटन अब कन्फरेन्स लिगको उपाधि जित्ने चौथो इंग्लिस क्लब बन्ने लक्ष्यमा हुनेछ। यसअघि वेस्ट ह्याम, चेल्सी र क्रिस्टल प्यालेसले यो उपाधि जितिसकेका छन्। ब्राइटनले अब आइतबार प्रिमियर लिगअन्तर्गत स्ट्यामफोर्ड ब्रिजमा चेल्सीको सामना गर्नेछ।