काठमाडौं । राष्ट्रिय स्वतन्त्र पार्टी (रास्वपा) की सांसद रचना खतिवडाले सहिद परिवार तथा घाइतेहरूको न्याय र उनीहरूप्रतिको राज्यको जिम्मेवारीबारे सरकारको ध्यानाकर्षण गराएकी छन्।
प्रतिनिधिसभाको बैठकमा बोल्दै उनले परिवर्तनका लागि ज्यान गुमाएका सहिदका परिवार र आन्दोलनमा घाइते भएकाहरू अझै पनि न्यायको प्रतीक्षामा रहनुपर्ने अवस्था रहेको बताइन्। सहिद परिवारले उठाएका प्रश्नको जवाफ सरकारले दिनुपर्ने उनको भनाइ थियो। सांसद खतिवडाले सहिद परिवारले न्याय कहिले पाउने भन्ने प्रश्न गर्दै सरकारले उनीहरूको पीडा र मागलाई प्राथमिकतामा राख्नुपर्ने बताइन्। यसअघि पनि उनले सहिदप्रति राज्यले देखाउनुपर्ने गम्भीरता नदेखिएको भन्दै प्रश्न उठाएकी थिइन्।
उनले जेलमा रहेका जेनजी आन्दोलनका थुनुवालाई तत्काल रिहा गर्नसमेत सरकारसँग माग गरिन्। साथै, सहिद दिवसलाई केवल औपचारिक कार्यक्रम र श्रद्धाञ्जलीमा सीमित नगरी सहिद परिवारप्रतिको राज्यको जिम्मेवारी पूरा गर्नुपर्नेमा जोड दिइन्। खतिवडाले हरेक वर्ष सहिदलाई सम्झिने तर उनीहरूका परिवारका समस्या समाधानतर्फ पर्याप्त ध्यान नदिने अवस्था अन्त्य गर्नुपर्ने बताइन्। पीडित परिवारका माग सम्बोधन गर्न र उनीहरूलाई न्यायको अनुभूति हुने गरी काम गर्न उनले सरकारसँग आग्रह गरिन्। सांसद खतिवडा जेनजी आन्दोलनमा ज्यान गुमाएका रसिक खतिवडाकी आमा समेत हुन्। उनले सहिद तथा घाइतेहरूको विषयमा संसदमा निरन्तर प्रश्न उठाउँदै आएको सार्वजनिक विवरणमा उल्लेख छ।