काठमाडौं। नेपाल प्रिमियर लिग (एनपीएल) क्रिकेटअन्तर्गत आज मंगलबार दुई खेल हुँदैछन्। प्रतियोगिताको पहिलो दिन एक खेल भएकोमा दोस्रो दिनदेखि खेलतालिका व्यस्त बन्न लागेको हो।
आजको पहिलो खेलमा चितवन राइनोज र विराटनगर किङ्ग्स आमनेसामने हुनेछन्। यी दुई टोलीबीचको प्रतिस्पर्धा दिउँसो १२ः३० बजे सुरु हुनेछ। त्यसैगरी, आजै साँझ ५ बजे जनकपुर बोल्ट्स र कर्णाली याक्सबीच दोस्रो खेल हुनेछ। सोमबारदेखि सुरु भएको प्रतियोगिताको उद्घाटन खेलमा लुम्बिनी लायन्सले सुदूरपश्चिम रोयल्सलाई ७ विकेटले पराजित गर्दै विजयी सुरुवात गरेको थियो।
चितवन र विराटनगरको प्रतिस्पर्धा
कुशल मल्लको कप्तानीमा रहेको चितवन राइनोजमा देव खनाल, अर्जुन साउद, रिजन ढकाल, कमलसिंह ऐरी, दीपक बोहरा, रवि बोपारा, सिकन्दर राजा, कलिम साना, विवेक यादव, हसन अली र उसामा मीरलगायतका खेलाडी छन्। यता सन्दीप लामिछानेको नेतृत्वमा रहेको विराटनगर किङ्ग्समा लोकेश बम, बसिर अहमद, प्रतिश जीसी, सुवास भण्डारी, नारायण जोशी, नरेन साउद, सुजन थपलिया, आन्द्रे रसेल, एन्जेलो म्याथ्युज र चरिथ असलंकालगायतका खेलाडी छन्। दुवै टोली बलिया खेलाडीका साथ मैदान उत्रने भएकाले पहिलो खेलमा जित निकाल्ने लक्ष्यसहित प्रतिस्पर्धा गर्नेछन्।
जनकपुर र कर्णालीबीच साँझको भिडन्त
आजको दोस्रो खेलमा जनकपुर बोल्ट्स र कर्णाली याक्सबीच प्रतिस्पर्धा हुनेछ। हर्मित सिंहको कप्तानीमा रहेको जनकपुरको टोलीमा कुशल परेरा, ललित राजवंशी, अनिल साह, मयन यादव, जिमी नीशम, मोइन अली र इफ्तिकार अहमदलगायतका खेलाडी छन्। त्यस्तै, सोमपाल कामीको कप्तानीमा रहेको कर्णाली याक्समा डेभिड मिलर, नन्दन यादव, युवराज खत्री, पवन सर्राफ, दीपक डुम्रे, शुभ कंसाकार र दिवान पुनलगायतका खेलाडी समावेश छन्।
दुवै टोली आजको खेल जित्दै प्रतियोगितामा आफ्नो स्थिति बलियो बनाउने लक्ष्यमा रहनेछन्। सोमबारदेखि सुरु भएको एनपीएलको फाइनल खेल आगामी मङ्सिर ५ गते हुने तालिका छ। प्रतियोगितामा सहभागी टोलीबीचको प्रतिस्पर्धाले आगामी दिनमा लिगको समीकरण थप रोचक बनाउने अपेक्षा गरिएको छ।